نوشہرہ کی تحصیل پبی کے علاقے ڈاگ جدید میں ایک رہائشی مکان کی چھت گرنے کا افسوسناک حادثہ پیش آیا جس میں کئی افراد جان کی بازی ہار گئے۔
ریسکیو 1122 کے مطابق حادثہ اس وقت پیش آیا جب گھر کی چھت اچانک منہدم ہوگئی، جس کے باعث آٹھ افراد ملبے تلے دب گئے۔ ابتدائی معلومات کے مطابق پانچ افراد موقع پر دم توڑ گئے جبکہ تین افراد شدید زخمی ہوئے۔
اطلاع ملتے ہی نوشہرہ ریسکیو 1122 کی میڈیکل اور ڈیزاسٹر ریسپانس ٹیمیں فوری طور پر جائے وقوعہ پر پہنچیں اور امدادی کارروائیاں شروع کر دیں۔ ریسکیو اہلکاروں نے مسلسل کوششوں کے بعد ملبے میں پھنسے تمام افراد کو نکال کر زخمیوں اور جاں بحق افراد کو ابتدائی طبی امداد دینے کے بعد پبی اسپتال منتقل کیا۔
حادثے کی خبر ملتے ہی ڈائریکٹر آپریشنز ریسکیو خیبرپختونخوا ڈاکٹر میر عالم خان اور ڈسٹرکٹ ایمرجنسی آفیسر نوشہرہ ملک اشفاق حسین بھی موقع پر پہنچ گئے۔ دونوں افسران نے امدادی کارروائیوں کی نگرانی کی، ٹیموں کو رہنمائی فراہم کی اور مجموعی صورتحال کا جائزہ لیا۔
