خیبر پختونخوا کے ضلع اپر جنوبی وزیرستان اور ایف آر ٹانک میں زعفران کی کاشت نے شاندار کامیابی حاصل کی ہے۔
صوبے میں زعفران کے فروغ کے لیے شروع کیے گئے منصوبے “انٹروڈکشن اینڈ پروموشن آف زعفران اِن پوٹینشل ڈسٹرکٹس” کے تحت دونوں علاقوں میں بنجر زمینوں کو زرعی استعمال کے قابل بنا کر ایک نئے زرعی دور کا آغاز ہو چکا ہے۔
مقامی کسان بتاتے ہیں کہ روزانہ سینکڑوں کی تعداد میں زعفران کے پھول نکل رہے ہیں، جو اس بات کا ثبوت ہے کہ اپر وزیرستان اور ایف آر ٹانک تیزی کے ساتھ ہائی ویلیو کراپس کے اہم مراکز کے طور پر سامنے آ رہے ہیں۔
کسانوں نے ایگریکلچر ایکسٹینشن ڈیپارٹمنٹ اپر وزیرستان کے عملے کی کارکردگی کو بھی انتہائی سراہا ہے۔ ان کے مطابق محکمہ زراعت کے افسران اور فیلڈ اسٹاف نے جدید طریقۂ کار، فیلڈ وزٹس، تربیت اور مکمل تکنیکی رہنمائی فراہم کر کے ان کی بھرپور مدد کی۔
کاشت کاروں کا کہنا ہے کہ زعفران کی اس کامیاب فصل نے علاقے کے لوگوں کے لیے روزگار اور ترقی کے نئے راستے کھول دیے ہیں، جبکہ محکمہ زراعت کی محنت اور رہنمائی اس کامیابی میں بنیادی کردار رکھتی ہے۔
