قومی ویمنز کرکٹ ٹیم کی کپتان فاطمہ ثناء نے ورلڈکپ کے دوران بارش سے متاثر ہونے والے میچز پر مایوسی کا اظہار کرتے ہوئے کہا ہے کہ آئی سی سی کو ٹورنامنٹ کے لیے موسم کے لحاظ سے موزوں مقامات کا انتخاب کرنا چاہیے۔
کولمبو میں پاکستان اور سری لنکا کے درمیان شیڈول میچ بارش کے باعث منسوخ ہوگیا، جس کے بعد پاکستان کا ورلڈکپ مہم ایک بھی کامیابی کے بغیر ختم ہوگئی۔
میچ کے بعد میڈیا سے گفتگو میں فاطمہ ثناء نے کہا کہ ہم ورلڈکپ کے لیے چار سال انتظار کرتے ہیں، اس لیے ضروری ہے کہ میچز ایسی جگہوں پر ہوں جہاں موسم کھیل کے لیے سازگار رہے۔
انہوں نے مزید کہا کہ ٹیم نے حالیہ عرصے میں زیادہ کرکٹ نہیں کھیلی، جس کا اثر کارکردگی پر بھی پڑا۔
