خیبر پختونخوا کے اضلاع دیر اور سوات میں گرج چمک کے ساتھ ہونے والی موسلادھار بارش اور ژالہ باری نے موسم سرد کر دیا۔
دیر میں بارش کے دوران آسمان پر گھنے بادل چھا گئے اور اندھیرا چھا جانے سے دن میں رات کا سا سماں پیدا ہوگیا۔ ندی نالوں میں طغیانی کے باعث جی ٹی روڈ پر ٹریفک کا نظام متاثر ہوا جبکہ بالائی علاقوں میں سڑکوں کے کٹاؤ کے بعد لوگ گھروں تک محدود ہو کر رہ گئے۔
شدید بارش اور ژالہ باری سے کھڑی فصلوں، میوہ جات کے باغات اور گاڑیوں کو نقصان پہنچا، جب کہ بجلی کا نظام بھی درہم برہم ہو گیا اور کئی علاقوں میں بجلی کی فراہمی معطل رہی۔
دوسری جانب، سوات میں بھی تیز بارش اور ژالہ باری سے سردی کی شدت میں اضافہ محسوس کیا جا رہا ہے۔ مینگورہ شہر میں ندی نالوں میں طغیانی کے باعث پانی گلیوں اور سڑکوں پر پھیل گیا۔
ڈبلیو ایس ایس سی کی کارکردگی ایک بار پھر سوالیہ نشان بن گئی، کیونکہ نالوں کی بروقت صفائی نہ ہونے سے بند نالوں کا پانی سڑکوں پر آگیا۔ سڑکوں پر جمع پانی کے باعث شہریوں کو شدید مشکلات اور ٹریفک جام کا سامنا ہے۔
