پشاور: وزیراعلیٰ خیبر پختونخوا سہیل آفریدی نے بانی پاکستان تحریک انصاف عمران خان سے ملاقات کے لیے چیف جسٹس آف پاکستان کو خط ارسال کر دیا ہے۔
ذرائع کے مطابق یہ خط ایڈووکیٹ جنرل خیبر پختونخوا کے توسط سے چیف جسٹس کو بھیجا گیا ہے۔ خط میں استدعا کی گئی ہے کہ چیف جسٹس سپرنٹنڈنٹ اڈیالہ جیل اور وزارت داخلہ کو ہدایت دیں کہ وزیراعلیٰ کو بانی پی ٹی آئی سے ملاقات کی اجازت دی جائے۔
وزیراعلیٰ کے خط میں مؤقف اختیار کیا گیا ہے کہ علی امین گنڈاپور کے استعفے کے بعد وہ نئے وزیراعلیٰ منتخب ہوئے ہیں اور انہیں فوری طور پر حکومتی امور سنبھالنے ہیں۔ اس ضمن میں صوبائی کابینہ کی تشکیل اور دیگر اہم معاملات پر بانی پی ٹی آئی سے مشاورت ناگزیر ہے۔
سہیل آفریدی نے اپنے خط میں مزید بتایا کہ وہ اس سلسلے میں وزارت داخلہ، سیکریٹری داخلہ اور پنجاب حکومت کو بھی تحریری طور پر آگاہ کرچکے ہیں۔ ان کے مطابق بین الصوبائی معاملات، خصوصاً پنجاب کی جانب سے گندم کی ترسیل پر پابندی جیسے معاملات پر رہنمائی حاصل کرنا ضروری ہے۔
وزیراعلیٰ نے زور دیا کہ وہ خیبر پختونخوا کے ساڑھے چار کروڑ عوام کے نمائندے ہیں اور اپنی جماعت کے سربراہ سے آئینی و سیاسی رہنمائی لینا ان کا حق اور ذمہ داری ہے۔ انہوں نے درخواست کی کہ عوامی مفاد میں انہیں اڈیالہ جیل میں متعلقہ حکام کی نگرانی میں ملاقات کی اجازت دی جائے۔
