اسلام آباد:پاکستان میں آج انٹرنیٹ صارفین کو رفتار میں کمی یا جزوی تعطل کا سامنا ہو سکتا ہے کیونکہ بین الاقوامی سمندری کیبل میں مرمتی کام شروع کیا جا رہا ہے۔
پی ٹی سی ایل گروپ کے مطابق یہ مرمت ایک ضروری تکنیکی عمل ہے جس کا مقصد ملک بھر میں انٹرنیٹ سروس کے معیار اور استحکام کو بہتر بنانا ہے۔
ترجمان نے بتایا کہ انٹرنیشنل کیبل کنسورشیم نے سمندر میں بچھائی گئی کیبل کے ایک اہم رپیٹر کی مرمت کا شیڈول طے کیا ہے۔ یہ کام آج 14 اکتوبر صبح 11 بجے شروع ہوگا اور اس میں تقریباً 18 گھنٹے لگنے کی توقع ہے۔
مرمت کے دوران ملک کے مختلف حصوں میں انٹرنیٹ کی رفتار متاثر ہو سکتی ہے جبکہ کچھ علاقوں میں سروس جزوی طور پر معطل بھی رہنے کا امکان ہے۔
پی ٹی سی ایل ترجمان کے مطابق یہ عمل نیٹ ورک کو مزید مستحکم اور فعال رکھنے کے لیے ضروری ہے۔ ادارے نے صارفین سے عارضی مشکلات پر معذرت کرتے ہوئے یقین دلایا ہے کہ مرمتی کام مکمل ہوتے ہی انٹرنیٹ سروس بحال کر دی جائے گی اور بہتر رفتار فراہم کی جائے گی۔
