پاک–افغان سرحد پر واقع طورخم بارڈر بیس دن بند رہنے کے بعد دوبارہ کھول دیا گیا ہے۔ تاہم اس وقت یہ گزرگاہ صرف ان افغان شہریوں کی واپسی کے لیے استعمال ہو رہی ہے جو غیر قانونی طور پر پاکستان میں مقیم تھے، جبکہ عام آمدورفت اور تجارتی سرگرمیاں تاحال معطل ہیں۔
ضلعی انتظامیہ کے مطابق، بارڈر کو عارضی طور پر اس مقصد کے لیے کھولا گیا ہے کہ ملک میں موجود غیر قانونی افغان مہاجرین کو وطن واپس بھیجا جا سکے۔ ڈپٹی کمشنر خیبر بلال شاہد نے بتایا کہ امیگریشن سینٹر طورخم پر افغان پناہ گزینوں کی رجسٹریشن اور انٹری کے مراحل جاری ہیں، اور ضروری دستاویزی کارروائی کے بعد انہیں سرحد عبور کرنے کی اجازت دی جا رہی ہے۔
ان کا کہنا تھا کہ سرحدی گزرگاہ عام شہریوں اور تجارتی قافلوں کے لیے تاحکمِ ثانی بند رہے گی۔
