کراچی:پاکستان کرکٹ بورڈ (پی سی بی) نے جنوبی افریقہ کے خلاف پہلے ٹی ٹوئنٹی میچ کے لیے قومی ٹیم کی خصوصی پنک تھیم کٹ متعارف کرادی ہے۔
پی سی بی کے مطابق 28 اکتوبر کو راولپنڈی میں ہونے والے پہلے ٹی 20 میچ میں پاکستانی کھلاڑی بریسٹ کینسر آگاہی مہم “PINKtober” کا حصہ بنیں گے اور پنک رنگ کی جرسی پہن کر میدان میں اتریں گے۔ امپائرز، کمنٹیٹرز اور گراؤنڈ اسٹاف بھی پنک ربن لگا کر اس مہم میں شرکت کریں گے۔
پی سی بی کے چیف ایگزیکٹو آفیسر سمیر احمد سید کا کہنا ہے کہ کرکٹ جیسے مقبول کھیل کے ذریعے معاشرتی آگاہی پھیلانا قابلِ فخر عمل ہے۔ ان کے مطابق بروقت تشخیص سے بے شمار جانیں بچائی جا سکتی ہیں۔
میچ کے دوران اسٹمپس پر پنک برانڈنگ ہوگی جبکہ میدان کے اردگرد آگاہی سے متعلق پیغامات بھی دکھائے جائیں گے۔
یہ پہلا موقع ہے کہ پی سی بی نے کسی بین الاقوامی میچ کو بریسٹ کینسر آگاہی مہم سے منسلک کیا ہے۔ اس سے قبل “پنک ڈے” ایونٹس صرف پاکستان سپر لیگ (پی ایس ایل) کے دوران منعقد کیے جاتے تھے۔
سیریز کے دوسرے اور تیسرے ٹی ٹوئنٹی میچ 31 اکتوبر اور یکم نومبر کو لاہور میں ہوں گے، جب کہ تین ون ڈے میچوں کی سیریز 4 سے 8 نومبر تک فیصل آباد میں کھیلی جائے گی۔
