ڈیرہ اسماعیل خان سے تعلق رکھنے والے پاکستانی مارشل آرٹسٹ عرفان محسود نے ناروے کے سیور دائرسن کا گینیز ورلڈ ریکارڈ توڑ کر ایک اور عالمی اعزاز حاصل کر لیا۔
سیور دائرسن نے ایک منٹ میں 80 پاؤنڈ وزن کے ساتھ 38 فنگر ٹیپ پش اپس کیے تھے، تاہم عرفان محسود نے یہ کارنامہ 42 پش اپس مکمل کر کے انجام دیا اور نیا عالمی ریکارڈ قائم کیا۔
صرف نو برسوں میں عرفان محسود نے 150 گینیز ورلڈ ریکارڈز بنا کر ایسا اعزاز حاصل کیا ہے جو اب تک کسی پاکستانی کے حصے میں نہیں آیا۔ پش اپس کیٹیگری میں وہ 70 سے زائد عالمی ریکارڈز کے ساتھ دنیا بھر میں سرفہرست ہیں۔
انہوں نے مختلف وزنوں، جن میں 100، 80، 60 اور 40 پاؤنڈ شامل ہیں، میں سب سے زیادہ ریکارڈ اپنے نام کیے۔ اس کے علاوہ انہوں نے مارشل پش اپس، اسکواٹس، جمپنگ جیکس، سٹیپ اپس، نی سٹرائکس، ایلبو سٹرائکس، سائڈ جمپس، ہائی جمپس اور اسٹار جمپس جیسی کئی اقسام میں بھی نمایاں کامیابیاں حاصل کی ہیں۔
اب تک عرفان محسود 20 مختلف ممالک کے ایتھلیٹس کے ریکارڈ توڑ چکے ہیں جن میں امریکہ، برطانیہ، بھارت، چین، ناروے، جرمنی، فرانس، فن لینڈ، فلپائن، اسپین، اٹلی، لبنان، مصر، عراق، شام اور پاکستان شامل ہیں۔
ان کے 20 شاگرد بھی گینیز ورلڈ ریکارڈز حاصل کر چکے ہیں۔ عرفان محسود کی شاندار کارکردگی کے اعتراف میں انہیں 2023 میں صدارتی ایوارڈ برائے حسنِ کارکردگی سے نوازا گیا۔
