نیروبی: کینیا کے ساحلی ضلع کوالے میں ایک مسافر طیارہ گر کر تباہ ہوگیا، جس کے نتیجے میں غیر ملکی سیاحوں سمیت 11 افراد ہلاک ہوگئے۔
غیر ملکی میڈیا رپورٹس کے مطابق یہ طیارہ کینیا کی نجی ایئرلائن ممباسا ایئر سفاری کا تھا۔ ایئرلائن نے تصدیق کی کہ حادثے میں مقامی عملے کے ارکان کے ساتھ ہنگری اور جرمنی کے شہری بھی ہلاک ہوئے ہیں۔
بیان میں بتایا گیا کہ طیارے میں موجود تمام دس مسافر اور کپتان حادثے میں جاں بحق ہوگئے۔ ہلاک ہونے والوں میں آٹھ کا تعلق ہنگری اور دو کا تعلق جرمنی سے تھا، جبکہ پائلٹ کینیا کا شہری تھا۔
کینیا کی سول ایوی ایشن اتھارٹی کے مطابق حادثہ کوالے کے پہاڑی علاقے میں پیش آیا۔ طیارے میں سوار تمام سیاح ماسائی مارا نیشنل ریزرو کی جانب جا رہے تھے۔
حکام نے بتایا کہ حادثے کا مقام ڈیانی ساحل سے تقریباً چالیس کلومیٹر دور ہے، جو ایک گھنے جنگل کے قریب واقع ہے۔
الجزیرہ کے مطابق مقامی میڈیا نے بتایا کہ لاشیں بری طرح جھلس جانے کے باعث شناخت کے قابل نہیں رہیں۔
عینی شاہدین کا کہنا تھا کہ انہوں نے زور دار دھماکے کی آواز سنی اور جب موقع پر پہنچے تو لاشیں بکھری ہوئی تھیں۔
کوالے کاؤنٹی کے کمشنر اسٹیفن اورینڈے نے بتایا کہ تحقیقاتی ادارے حادثے کی وجوہات جاننے کی کوشش کر رہے ہیں۔
