قومی کرکٹ ٹیم کے سابق کپتان شعیب ملک نے کہا ہے کہ خیبرپختونخوا میں کرکٹ کا بے پناہ ٹیلنٹ موجود ہے، اسی لیے وہ یہاں نئے کھلاڑیوں کی تلاش کے لیے آئے ہیں۔
پشاور میں منعقدہ “ٹیلنٹ ہنٹ” کرکٹ ایپ کی افتتاحی تقریب سے خطاب کرتے ہوئے شعیب ملک نے کہا کہ پاکستان کرکٹ کی کارکردگی میں حالیہ برسوں میں کمی ضرور آئی ہے، لیکن اگر ڈومیسٹک کرکٹ کے نظام کو بہتر بنایا جائے تو قومی ٹیم دوبارہ عروج حاصل کر سکتی ہے۔ ان کا کہنا تھا کہ اچھے کھلاڑی ہمیشہ نچلی سطح سے سامنے آتے ہیں، اس لیے مقامی سطح پر کرکٹ کے ڈھانچے کو مضبوط بنانا ضروری ہے۔
انہوں نے مزید کہا کہ سعودی عرب کے لیے خیبرپختونخوا سے ٹیلنٹ تلاش کر کے کھلاڑیوں کو اسکالرشپ پر لے جانا ایک مثبت قدم ہے، جس سے یہاں کے نوجوان کرکٹرز کو نہ صرف کھیل میں نکھار ملے گا بلکہ بین الاقوامی سطح پر خود کو منوانے کے مواقع بھی حاصل ہوں گے۔
تقریب میں سابق افغان کوچ کبیر خان نے بھی شرکت کی۔ انہوں نے کہا کہ انڈر 16 اور انڈر 19 کرکٹ کو بڑے اسٹیڈیمز میں لانا وقت کی ضرورت ہے۔ ان کے مطابق ملک کے لیے کھیلنے کا جذبہ، خلوص نیت اور تسلسل کامیابی کے لیے بنیادی عناصر ہیں۔ کبیر خان نے کہا کہ محنت اور مستقل مزاجی ہی پاکستان کو دوبارہ ٹی ٹوئنٹی، ٹیسٹ اور ون ڈے کرکٹ میں فتوحات کی راہ پر گامزن کر سکتی ہے۔
ٹیلنٹ ہنٹ ایپ کے منتظمین کا کہنا تھا کہ اس پلیٹ فارم کے ذریعے نوجوان کرکٹرز کو تلاش کر کے سعودی عرب سمیت مختلف بین الاقوامی لیگز میں کھیلنے کے مواقع فراہم کیے جائیں گے۔
تقریب میں نوجوان کھلاڑیوں، کوچز اور کرکٹ شائقین کی بڑی تعداد موجود تھی، جنہوں نے اس اقدام کو خیبرپختونخوا میں کھیلوں کی بحالی اور فروغ کے لیے ایک خوش آئند پیش رفت قرار دیا۔
