راولپنڈی میں کھیلے گئے دوسرے ٹیسٹ میں جنوبی افریقا نے پاکستان کو شکست دے کر دو میچز کی سیریز 1-1 سے برابر کردی۔
مہمان ٹیم نے 68 رنز کا ہدف دو وکٹوں کے نقصان پر باآسانی حاصل کرلیا۔ یہ کامیابی جنوبی افریقا کی پاکستانی سرزمین پر 2007 کے بعد پہلی ٹیسٹ فتح ہے۔
کپتان ایڈن مارکرم 42 رنز بنا کر آؤٹ ہوئے، جب کہ ٹرسٹان اسٹبس بغیر کوئی رن بنائے پویلین لوٹے۔ رائن ریکلٹن 25 رنز کے ساتھ ناٹ آؤٹ رہے۔ پاکستان کی جانب سے نعمان علی نے دونوں وکٹیں حاصل کیں۔
اس سے قبل پاکستانی بلے باز دوسری اننگز میں ناکامی سے دوچار رہے۔ چوتھے روز پاکستان نے 94 رنز پر چار کھلاڑی آؤٹ کے ساتھ اننگز کا آغاز کیا تو کپتان بابر اعظم (51) صرف ایک رن کا اضافہ کر کے جلدی آؤٹ ہوگئے۔ محمد رضوان 18، سلمان آغا 28 اور ساجد خان 13 رنز بنا سکے، جب کہ نعمان علی اور شاہین آفریدی بغیر کھاتہ کھولے پویلین لوٹے۔
گزشتہ روز پاکستان نے 71 رنز کے خسارے کے ساتھ دوسری اننگز کا آغاز کیا تھا اور ابتدائی تین بلے باز — امام الحق (9)، عبداللہ شفیق (6) اور شان مسعود (0) — صرف 16 کے مجموعی اسکور پر آؤٹ ہوگئے تھے۔ بابر اعظم اور سعود شکیل نے 44 رنز کی شراکت قائم کی، مگر سعود شکیل 11 پر آؤٹ ہو گئے۔
پوری ٹیم 138 رنز پر ڈھیر ہوگئی، یوں جنوبی افریقا کو جیت کے لیے محض 68 رنز کا ہدف ملا۔
جنوبی افریقا کی جانب سے سائمن ہارمر نے 6، کیشو مہاراج نے 2 اور کگیسو ربادا نے ایک وکٹ حاصل کی۔
پہلی اننگز میں پاکستان نے ٹاس جیت کر بیٹنگ کرتے ہوئے 333 رنز بنائے تھے، جن میں شان مسعود 87، سعود شکیل 66 اور عبداللہ شفیق 57 کے ساتھ نمایاں رہے۔ جنوبی افریقا کے کیشو مہاراج نے 7 وکٹیں حاصل کی تھیں۔
جواب میں مہمان ٹیم نے 404 رنز بنا کر 71 رنز کی برتری حاصل کی۔ متھوسامی 89 رنز پر ناٹ آؤٹ رہے، جب کہ ٹرسٹان اسٹبس نے 76 اور کگیسو ربادا نے 71 رنز کی اننگز کھیل کر ٹیم کو مستحکم کیا۔
پاکستان کی جانب سے آصف آفریدی نے شاندار ڈیبیو کرتے ہوئے 6 وکٹیں حاصل کیں، نعمان علی نے 2 جبکہ شاہین اور ساجد خان نے ایک ایک وکٹ حاصل کی۔ آصف آفریدی ڈیبیو پر پانچ یا زائد وکٹیں لینے والے پاکستان کے دوسرے لیفٹ آرم اسپنر بن گئے۔
