جنوبی افریقہ نے ویمنز ورلڈ کپ کے سیمی فائنل میں انگلینڈ کو 125 رنز سے شکست دے کر پہلی بار فائنل میں جگہ بنا کر نئی تاریخ رقم کردی۔
گوہاٹی میں کھیلے گئے میچ میں جنوبی افریقہ نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں سات وکٹوں کے نقصان پر 319 رنز بنائے۔ کپتان لورا وولوارٹ نے شاندار کھیل پیش کرتے ہوئے 143 گیندوں پر 169 رنز کی کیریئر کی بہترین اننگز کھیلی، جس میں بیس چوکے اور چار چھکے شامل تھے۔
تزمین برٹس نے 45 اور مریزان کیپ نے تیز رفتار 42 رنز کی اننگز کھیلی جبکہ شول ٹائرون 33 اور ناڈین ڈی کلرک 11 رنز کے ساتھ ناٹ آؤٹ رہیں۔ انگلینڈ کی جانب سے صوفی ایکلسٹن نے چار اور لورین بیل نے دو وکٹیں حاصل کیں۔
ہدف کے تعاقب میں انگلینڈ کی بیٹنگ لائن آغاز ہی سے دباؤ کا شکار رہی اور پوری ٹیم 42.3 اوورز میں 194 رنز پر ڈھیر ہوگئی۔ ٹاپ آرڈر بلے باز ایمی جونز، ٹیمی بیومونٹ اور ہیتھر نائٹ بغیر کوئی رن بنائے آؤٹ ہوئیں۔
نیٹ اسکیور برنٹ نے 64 اور ایلیس کیپسی نے 50 رنز بنا کر کچھ مزاحمت کی لیکن وہ ٹیم کو شکست سے نہ بچا سکیں۔ ڈینی ویاٹ ہوج نے 34 جبکہ لنزے اسمتھ نے 27 رنز بنائے۔
جنوبی افریقہ کی جانب سے مریزان کیپ نے شاندار بولنگ کا مظاہرہ کرتے ہوئے پانچ وکٹیں حاصل کیں۔ ناڈین ڈی کلرک نے دو جبکہ آیابونگا خاکا، ملابا اور سون لوس نے ایک ایک وکٹ حاصل کی۔
دوسرا سیمی فائنل آج دفاعی چیمپئن آسٹریلیا اور میزبان بھارت کے درمیان کھیلا جائے گا۔ اب تک کے 12 ایڈیشنز میں آسٹریلیا سات، انگلینڈ چار اور نیوزی لینڈ ایک مرتبہ چیمپئن بن چکے ہیں۔ جنوبی افریقہ کے پاس اس بار پہلی مرتبہ ٹرافی جیتنے کا سنہری موقع ہے۔
