بھارتی کرکٹر ویرات کوہلی نے ون ڈے کرکٹ میں ایک اور اہم سنگ میل عبور کرلیا ہے۔
سڈنی کرکٹ گراؤنڈ میں آسٹریلیا کے خلاف تیسرے اور آخری ون ڈے میچ کے دوران کوہلی نے شاندار بلے بازی کرتے ہوئے سابق سری لنکن بیٹر کمار سنگاکارا کو پیچھے چھوڑ دیا۔
کوہلی نے 81 گیندوں پر 74 رنز کی میچ وننگ اننگز کھیل کر ون ڈے انٹرنیشنل کی تاریخ میں سب سے زیادہ رنز بنانے والے دوسرے کھلاڑی کا اعزاز حاصل کرلیا۔
اب تک ویرات کوہلی 305 میچوں میں 57.71 کی اوسط سے 14 ہزار 255 رنز بنا چکے ہیں، جن میں 75 نصف سنچریاں اور 51 سنچریاں شامل ہیں۔
کمار سنگاکارا اب تیسرے نمبر پر ہیں، جنہوں نے 404 میچوں میں 14 ہزار 234 رنز اسکور کیے، جن میں 93 نصف سنچریاں اور 25 سنچریاں شامل ہیں۔
ون ڈے کرکٹ میں سب سے زیادہ رنز بنانے کا ریکارڈ تاحال بھارتی لیجنڈ سچن ٹنڈولکر کے پاس ہے، جنہوں نے 463 میچوں میں 44.83 کی اوسط سے 18 ہزار 426 رنز بنائے، جن میں 96 نصف سنچریاں اور 49 سنچریاں شامل ہیں۔
