ویمنز ورلڈکپ کے بارہویں میچ میں انگلینڈ نے شاندار کارکردگی دکھاتے ہوئے سری لنکا کو شکست دے دی اور فتوحات کی ہیٹ ٹرک مکمل کرلی۔
کولمبو میں کھیلے گئے مقابلے میں سری لنکا نے ٹاس جیت کر انگلینڈ کو بیٹنگ کی دعوت دی۔ انگلینڈ نے کپتان نتالی اسکیور برنٹ کی شاندار سنچری کی بدولت مقررہ اوورز میں نو وکٹوں کے نقصان پر 253 رنز بنائے۔ برنٹ نے 117 رنز کی عمدہ اننگز کھیلی، جبکہ ٹیمی بیمونٹ نے 32 اور ہیتھر نائٹ نے 29 رنز کا اضافہ کیا۔
سری لنکا کی جانب سے اینوکا راناویرا نے تین وکٹیں حاصل کیں، جبکہ پرابودھنی اور کماری نے دو دو کھلاڑیوں کو آؤٹ کیا۔
ہدف کے تعاقب میں سری لنکن ٹیم 45.4 اوورز میں 164 رنز بنا کر آؤٹ ہوگئی۔ ہاسینی پریرا نے 35، سمارا وکراما نے 33 اور نیلکشیکا سلوا نے 23 رنز اسکور کیے۔
انگلینڈ کی طرف سے صوفی ایکلیسٹون نے شاندار بولنگ کرتے ہوئے چار کھلاڑیوں کو پویلین بھیجا، جبکہ کپتان برنٹ اور چارلی ڈین نے دو دو وکٹیں حاصل کیں۔
اس کامیابی کے ساتھ انگلینڈ نے مسلسل تیسری فتح حاصل کر کے سیمی فائنل میں جگہ بنانے کے امکانات مزید روشن کرلیے ہیں۔
