پاکستان سپر لیگ (پی ایس ایل) کے چیف ایگزیکٹو آفیسر سلمان نصیر نے اعلان کیا ہے کہ لیگ کے گیارہویں ایڈیشن میں دو نئی فرنچائزز شامل کی جائیں گی۔
پی ایس ایل کے سرکاری پوڈکاسٹ میں گفتگو کرتے ہوئے سلمان نصیر نے بتایا کہ نئی ٹیموں کی فروخت کا عمل نومبر میں شروع ہوگا۔ ان کا کہنا تھا کہ مختلف سرمایہ کار فرنچائز حاصل کرنے میں گہری دلچسپی دکھا رہے ہیں اور اس مرحلے میں سخت مقابلے کی توقع ہے۔
انہوں نے مزید وضاحت کی کہ فرنچائزز کی ویلیوایشن کے ٹی او آرز مارچ میں طے کیے جا چکے ہیں، اور چند روز میں اس عمل کی تکمیل کے بعد جو مارکیٹ ویلیو سامنے آئے گی، وہی فرنچائزز کے لیے پیشکش کی بنیاد بنے گی۔
سلمان نصیر کے مطابق اس مرتبہ لیگ کے میچز چھ مختلف وینیوز پر کرانے پر غور کیا جا رہا ہے۔ انہوں نے بتایا کہ پشاور کا عمران خان اسٹیڈیم تقریباً تیار ہے، تاہم بین الاقوامی معیار کے مطابق چند اضافی اپ گریڈز درکار ہیں تاکہ ایونٹ کے آغاز تک گراؤنڈ مکمل طور پر تیار ہو جائے۔
پی ایس ایل کے سی ای او نے یہ بھی بتایا کہ فیصل آباد کو ایک نئے میزبان شہر کے طور پر شامل کرنے کا فیصلہ کر لیا گیا ہے۔
