پشاور: خیبرپختونخوا کی نو تشکیل شدہ کابینہ نے گورنر ہاؤس پشاور میں اپنے عہدوں کا حلف اٹھا لیا۔ تقریبِ حلف برداری میں گورنر فیصل کریم کنڈی نے نئے وزراء، مشیروں اور معاونِ خصوصی سے حلف لیا۔
حلف برداری تقریب میں وزیراعلیٰ سہیل آفریدی، اسپیکر صوبائی اسمبلی بابر سلیم، ارکان اسمبلی، پارٹی رہنما اور دیگر اہم شخصیات شریک تھیں۔
نئے صوبائی وزراء میں مینا خان آفریدی، ارشد ایوب خان، امجد علی، آفتاب عالم آفریدی، فضل شکور خان، خلیق الرحمٰن، ریاض خان، سید فخر جہان، عاقب اللہ خان اور فیصل خان شامل ہیں۔
گورنر ہاؤس میں یہ تقریب سہ پہر 3 بجے منعقد ہوئی، جہاں تمام نامزد اراکینِ کابینہ نے اپنے عہدوں کا حلف اٹھایا۔ نئی کابینہ میں مجموعی طور پر 13 اراکین شامل ہیں، جن میں 10 وزراء، 2 مشیر اور ایک معاونِ خصوصی شامل ہے۔
گورنر ہاؤس کے اعلامیے کے مطابق سابق مشیر خزانہ مزمل اسلم کو بھی کابینہ میں شامل کیا گیا ہے۔ اس کے علاوہ مینا خان، فضل شکور، فیصل ترکئی، عاقب اللہ، شفیع جان، خلیق الرحمٰن اور ڈاکٹر امجد علی بھی صوبائی کابینہ کا حصہ بنے ہیں۔
بونیر سے تعلق رکھنے والے ریاض خان، فخر جہان اور تاج محمد ترند کو بھی وزارتوں کی ذمہ داریاں سونپی گئی ہیں۔
تقریب کے اختتام پر گورنر فیصل کریم کنڈی نے تمام وزراء کو مبارکباد دیتے ہوئے نیک خواہشات کا اظہار کیا۔
