آج 5 نومبر کی شام دنیا بھر میں، بشمول پاکستان، آسمان پر سال کا سب سے بڑا اور روشن سپر مون دکھائی دے گا۔
سپارکو کے ترجمان کے مطابق یہ اس سال کے تین سپر مونز میں سے دوسرا ہے، جو اپنے غیر معمولی حجم اور چمک کی وجہ سے نمایاں ہوگا۔
سپر مون اس وقت بنتا ہے جب مکمل چاند اپنے مدار میں گردش کرتے ہوئے زمین کے قریب ترین فاصلے پر آ جاتا ہے، جس سے وہ عام دنوں کے مقابلے میں بڑا اور زیادہ روشن نظر آتا ہے۔
ترجمان کے مطابق آج شام چھ بج کر انیس منٹ پر چاند اپنی روشنی کے عروج پر ہوگا اور زمین سے اس کا فاصلہ تقریباً 221,817 میل رہ جائے گا۔ اس وقت چاند معمول کے حجم سے تقریباً 10 فیصد بڑا اور 16 فیصد زیادہ روشن دکھائی دے گا۔
یہ رواں سال کا دوسرا سپر مون ہے جبکہ تیسرا اور آخری سپر مون دسمبر میں دیکھا جا سکے گا۔ ماہرین فلکیات کے مطابق رواں سال کا بیور سپر مون سب سے زیادہ روشن اور خوبصورت نظارہ پیش کرے گا۔
پاکستان میں موسم سرما کے صاف آسمان کی وجہ سے یہ منظر اور بھی واضح نظر آئے گا۔ ماہرین کا کہنا ہے کہ شہروں کی روشنیوں سے دور مقامات سے یہ منظر زیادہ خوبصورتی سے دیکھا جا سکتا ہے۔
سپارکو کے مطابق چاند کے طلوع ہوتے ہی یہ مظہر اپنی پوری آب و تاب کے ساتھ نظر آئے گا، جو نہ صرف فلکیات کے شائقین بلکہ عام شہریوں کے لیے بھی دلچسپی اور مسرت کا باعث بنے گا۔
