وزیر اعظم کے معاونِ خصوصی برائے ضم شدہ اضلاع، مبارک زیب، نے اپنے وفد کے ہمراہ آج بینظیر انکم سپورٹ پروگرام (بی آئی ایس پی) کے مرکزی دفتر کا دورہ کیا، جہاں انہوں نے چیئرپرسن روبینہ خالد سے ملاقات کی۔ ملاقات کے دوران ضم شدہ اضلاع میں سماجی تحفظ اور فلاحی اقدامات پر تفصیلی تبادلہ خیال کیا گیا۔
مبارک زیب نے ضم شدہ علاقوں میں غربت کے خاتمے اور معاشی خودمختاری کے فروغ کے لیے بی آئی ایس پی کے کردار کو سراہتے ہوئے کہا کہ پروگرام کی رسائی کو مزید وسعت دینے کی ضرورت ہے تاکہ زیادہ سے زیادہ مستحق خاندان مستفید ہو سکیں۔
چیئرپرسن روبینہ خالد نے بتایا کہ بی آئی ایس پی ضم شدہ اضلاع میں ترجیحی بنیادوں پر کام کر رہا ہے اور حکومت کی ہدایت کے مطابق ضرورت مند خاندانوں کو مالی معاونت کی فراہمی یقینی بنانے کے لیے تمام وسائل استعمال کیے جا رہے ہیں۔
ملاقات کے اختتام پر دونوں رہنماؤں نے اتفاق کیا کہ ضم شدہ اضلاع میں سماجی تحفظ کے نظام کو مزید مؤثر بنانے کے لیے باہمی تعاون جاری رکھا جائے گا۔
