پاکستان نے جنوبی افریقا کو تیسرے اور آخری ایک روزہ میچ میں سات وکٹوں سے شکست دے کر تین میچوں کی سیریز ایک کے مقابلے میں دو سے اپنے نام کرلی۔
فیصل آباد کے اقبال اسٹیڈیم میں کھیلے گئے میچ میں میزبان ٹیم نے 144 رنز کا ہدف 25.1 اوورز میں تین وکٹوں کے نقصان پر حاصل کیا۔ پاکستان کی جانب سے صائم ایوب نے شاندار بلے بازی کرتے ہوئے 77 رنز بنائے۔ بابر اعظم 27 رنز بنا کر آؤٹ ہوئے جبکہ فخر زمان بغیر کوئی رن بنائے پویلین لوٹ گئے۔ محمد رضوان 32 اور آغا سلمان 5 رنز کے ساتھ ناٹ آؤٹ رہے۔ جنوبی افریقا کی جانب سے ناندرے برجر اور جورن فورٹن نے ایک ایک وکٹ حاصل کی۔
اس سے قبل ٹاس جیت کر پہلے بیٹنگ کرتے ہوئے جنوبی افریقی ٹیم 37.5 اوورز میں 143 رنز بنا کر آؤٹ ہوگئی۔ کوانٹن ڈی کاک 53 رنز کے ساتھ نمایاں رہے، جبکہ پریٹوریئس نے 39، پیٹر نے 16، اور کپتان برٹزکے نے 16 رنز بنائے۔ دیگر بلے باز قابل ذکر کارکردگی نہ دکھا سکے۔ ناندرے برجر 3 رنز بنا کر ناٹ آؤٹ رہے۔
پاکستان کی جانب سے ابرار احمد نے عمدہ بولنگ کرتے ہوئے چار کھلاڑیوں کو آؤٹ کیا، جبکہ شاہین شاہ آفریدی، محمد عامر اور آغا سلمان نے دو، دو وکٹیں حاصل کیں۔
