ضلع لکی مروت کے علاقے بیگوخیل روڈ پر ناورخیل موڑ کے قریب سڑک کنارے نصب بم کے دھماکے میں ایک بس کو نشانہ بنایا گیا، جس کے نتیجے میں ایک شخص جاں بحق جبکہ خواتین سمیت 9 افراد زخمی ہو گئے۔
پولیس کے مطابق دھماکا لکی سیمنٹ فیکٹری کی بس کے قریب ہوا، جس کے باعث بس مکمل طور پر تباہ ہو گئی۔ دھماکے کے نتیجے میں بس میں سوار ایک شخص موقع پر ہی جاں بحق ہو گیا، جبکہ زخمیوں میں دو خواتین بھی شامل ہیں۔
واقعے کی اطلاع ملتے ہی ریسکیو ٹیمیں اور پولیس فوری طور پر جائے وقوعہ پر پہنچ گئیں اور جاں بحق ہونے والے شخص اور زخمیوں کو فوری طور پر لکی ہسپتال منتقل کیا گیا۔ جاں بحق شخص کی شناخت فرید اللہ کے نام سے ہوئی ہے۔
ہسپتال ذرائع کے مطابق زخمیوں میں سے پانچ افراد کی حالت تشویشناک بتائی جا رہی ہے، جبکہ زخمیوں کا تعلق بیگوخیل سے بتایا جاتا ہے۔
دھماکے کے بعد پولیس اور سیکیورٹی فورسز نے علاقے کو گھیرے میں لے کر شواہد اکٹھے کیے اور واقعے کی نوعیت اور ذمہ داران کا تعین کرنے کے لیے تحقیقات کا آغاز کر دیا ہے۔ واقعے کے بعد علاقے میں سیکیورٹی مزید سخت کر دی گئی ہے۔
